健康精英当起再赢

猪拉多纳

　　嚟到季尾时份，热门马唔係赢得少，不过，泡汤者亦不计其数！所以，买热门有时要睇睇係咩马房，唔係话外国月亮特别圆，亦冇话大马房一定得，之但係，有部分下游马房又真係唔多靠得住，总之，奉劝大家买热门马，尤其细仓口，要三思再三思而後行。

　　第二场第四班1000米。「健康精英」由季初唔係幾识跑，临场亮相又急，赛事中又跑到乱晒笼，到上赛终於打开胜门，睇到隻马进度随着多跑多操之下，不断向上升。但点讲都好，上赛係唔叻嘅头马，事关幾匹败将再出冇隻掂。如果从另一角度去睇，若果开窍後隻马真係功力大增，话唔定可以执多剂，当然，重磅有冇影响，就要博嘞，不过，隔夜十幾倍，值博吖。

　　第四场第三班2000米。「财宝鹰」一连跑了3场1800米，曾经与「爪皇豪火」互有高低，又曾经输少少畀「驌龙」，计赛事级数的话，三班冇理由赢唔到。今次加程200米，够唔够气量？的确冇人知，好在上场加眼罩之後，隻马後劲的确有所增强，阿Paul应该心中有数，肯转路程应该有好冇坏，呢匹热门马幾稳阵。

　　第十场第三班1600米。「飞翔星」初出1400米追势唔错，翌仗加程再跑，幾乎赢埋咁滞，呢匹自购马进度嚟得好快。既然搵到暂时最佳出路，唔再试其他路程係稳中求胜，至於加面箍係好事定坏事？我又唔敢担保，不过，经过大闸测试，应该唔係博博吓。

资深评马人 陈华栋