「電訊」系鴻運當頭

猪拉多纳

年幾無拉過頭馬嘅「電訊」系張氏四兄弟，近期鴻運當頭，而且一係唔贏，一贏就打孖上。繼上周中谷戰夜賽，三佬張敬川名下「電訊至尊」打開勝門，轉個頭尋日沙田日賽，輪到大佬張敬石嘅「電訊高星」發威，勝出頭場五班二千米，雙喜臨門，而二佬張敬山就中咗搭第二場「風馳電掣」嘅第一口孖寶，買$100蚊派成$18,630。
       
電訊高星（6號）後上力擒朗天，潘頓居功至偉。

至於潘頓就人逢喜事精神爽，上周中跑馬地食大三元後，昨午又憑「電訊高星」及「小橋流水」增添進帳，季內頭馬數字衝破40大關。馬主張敬石大讚潘頓同「電訊高星」特別合拍，重溫一年多前幫馬匹開齋嘅好夢，而且亦感謝騎者嘅落力演出，終點前依然奮力策騎鬥贏「朗天」，功不可沒。佢亦感激呂健威將呢匹馬由嚴重傷患中，成功拯救出嚟，贏馬後續爭沙田長途賽事，有力繼續爭取好成績。