三月起计合作多成功 大摩柏宝超甜蜜

猪拉多纳

　　一双情人在火红红爱恋之中，梗係糖黐豆、如漆似胶、如鱼得水、连体婴咁款，呢啲叫做蜜运期又得，求恋期亦可。总之，都係形容情侣喺初期有幾痴缠，爱得有幾轰轰烈烈！

　　至於热情过咗气，仲有冇得维持到初相识时嘅感觉，要睇二人造化。换换形式嚟讲，放诸在马场之内，蔡约翰与韦达那段「关係」，的确经得起时间考验，「亲密」程度没受到年期影响，称得上合作无间！

　　至於近日出现嘅一pair，大摩与柏宝，「拍拖期」刚刚开始，睇成绩就知在糖黐豆阶段。如果由3月起计至今合作6驹，经常有佳作（5驹跑入前两名），「同个世界」在打吡大赛入Q、「讚惑」捧主席锦标等，另外，柏宝策「包装博士」及「飞闯」，亦以赢马作交代。

　　记得1/4那期赛事，摩柏同日有3匹马合作，成绩为两胜一负！而今日又係3件合作「傲闯」、「超群名驹」和「军事出击」，起个孖？赢晒3场？还是空手而回？以佢哋目前关係咁亲密，3驹亦具实力及近绩，点可能会冇成绩交出，一於捧呢对「蜜运」骑练，希望3隻至少赢到两W，咁就有本有利嘞。

Jack