御将军沙纸贺喜环保战士

猪拉多纳

　　谷草C栏向来利内档，大致上，今季冇变过。而根据1至3月那24场赛果而言，跑法倾向利中置和後上马，前领马唔係冇得赢，但所佔比例唔算多。唯一考虑则係今晚应会在慢地上演赛事，模式可能一下子反转？！

　　「御将军」回落至70分以下，分数唔再饱受压力（过去15场70分或以上赛事仅1P），加上，有埋好位及地利，並在缺课後有番一场热身（上赛前曾停工10日），整体条件比起前仗跑入殿军时理想。

　　「沙纸」体重回落係好事，基本上，评分已跌残晒，如跑得番八九成，已足够入围。「贺喜」接近年半未在此程上名，评分及状态作怪。实在前仗田草1400米受阻下亦幾乎有Q，隔了一场副车战败赛事，回到谷草够撼。「开心动力」唔係11档的话，攞住前仗末段甩韁及受困仍输近表现，在此场具入围本钱。

　　「仁爱之友」2月尾、3月初曾停了工夫，有戒心。「环保战士」目前未收敛，跑短途好过中距离，当然，10档及初跑谷草有顾忌，但十幾倍可博一注。

　　「元豐泰」草地赛最叻第五名（田草1200米），谷草次次跑十名以外，係咪换个柏宝及档好足以扭转晒？两睇囉。要博只因五班略超。

　　「好辣椒」五班强，此程準，一样档靓，变化地又有根据，如与前驹赔率差得远，此马仲值博。

　　「飞天龙驹」季中演出开始稳定落嚟，尤其冇配备及专攻短途後。「千笑」和「嘻哈大少」排外档，如早段切唔到入嚟，唔易捱到。「凯旋无敌」唔係睇得唔跑得的话，转马房首仗已要高度重视。

　　「天鹰」情况与廐侣「喜万家」近似，惯性在季尾会郁手，睇过赛程表，今次之後，五班谷草直至五月尾再冇长途，应该冇得再等。

　　「步如飞」少数长期交到段追劲嘅五班马，谷草场合更见稳定。「速度快」上赛早段被抢去自领地位，先至跑唔出水準，今场如畀佢放得顺，就会似番前仗赢马时。「康乐名驹」重戴眼罩起到作用，计正转路程更好，係惊场地影响。「碧玉钗」如果唔係取位较短视，上场直路根本唔使兜入兜出，更加唔会冇前四名，确认五班係有得争，希望换人有唔同发挥。

　　「喜劲驹」连仗在1400米追得劲，转场对手实力下降，而唔少同父马属此程好手，有力出头。「伟龙」有本事冚赢「轻越直前」、「明旺」，目前分数未到顶，向来地慢亦好，有权捲土重来。

　　「业盛於和」躁底、慢闸、走规唔好，令佢跑极唔上名，希望加脷带对操控有助，以及在谷草赢点级数。「风力威猛」及「横亨」，前驹分利却长期积弱，唔知边场会返嚟；後驹近仗演出波动可以好大，只宜拖脚。

　　「金狮骏将」坐完马监，重返四班，抽到2档，所遇对手唔多叻，重磅依然有赢面。「田园名驹」顶唔顶得到第三仗，稍有疑问，尊重近两仗逆境有Q赛绩才拖。

　　「永顺益」及「卡加精神」，单睇刚仗同场彼此末段追势，前驹较讨好，当然，今场排外档，担心早段留得太後，又追唔切。「金湶」初跑谷草沿路二叠，拉士仍然好韧，跑长200米更乐观。

　　今场各驹皆有跑到冇影嘅潜在可能，10隻马场合唔代表易拣；「开心老友」好大程度因为打水战超掂至拣，分数则已加到爆錶咁滞。

　　「千杯不醉」近仗係得泥地一哩那场唔识追，谷草一向够坚（跨季8场只得1场冇奖金），但跑长400米仲有冇咁爆得？「沙贝利」跑开G3，转到谷草边搵到「自由好」等驹，若场地唔係太慢，靠班底及近态，有资格捧盃。

　　「威利旺旺」和「智多飞」，未必齐齐拖慢放，随时大家冇so。「同个世界」及「多名利」，齐齐初跑谷草，後驹赢级数又略有赔率，较可取。

　　「大把世界」经过前仗後搏完散了，还是其他原因？未可得知，不过，今仗3档起步，预期形势似足入Q时一样，如输完一场回够气，随时翻生。「渐信良驹」慢地冇问题，且经常会赚形势，可能今场又会闯入三甲。

　　「一团威」季初好黏地一样追得好，因上场拣开（塞车才输），跟多场。「但求胜」跑一哩係咪一定要放头？可能未必，尤其今场内档关係，总之，前仗初跑此程，放得唔算有尺寸，直路都断唔晒。

　　「阳光普照」段段快赢「驾翠」，除非加磅後令能力下降唔少，若不，两驹再遇，仍秤先前驹。

　　「财骏福星」略嫌上场末段唔够肉紧及胆色，但隻马自己识追，可能渐过低潮，今仗换人並加程，有期望。「好球」淋地可应付，转回谷草对手又唔同，实在上赛拉士受困之後冇骑过，名次才会落後，有赔率可敲。

马会赛马节目主持 洪礼贤