李寶利復出即爆萬寶駒

猪拉多纳

意大利好手李寶利早排開齋兼起孖就被罰停賽，尋日佢復出依然保持住個旺勢，先喺頭場騎隻「鼓浪春風」跑第二，到第三場成績就更進一步，夥拍苗禮德嗰隻「萬寶駒」建功，爆出27倍冷Ｗ，復出立即有馬贏，證明呢個小子漸漸適應香港嘅賽事模式。
       
萬寶駒初跑泥地即顯露本色，爆出27倍冷Ｗ。
轉往法國發展

雖然李寶利手風漸順，但係佢跑埋下個禮拜嘅女皇盃後就會離港，據知佢已經聯絡咗紀仁安嘅經理人Alexis，今年轉往法國發展，睇吓可唔可以再有突破。對於李寶利即將離港，苗禮德就猛話可惜，事關佢覺得香港正正需要好似李寶利呢類後生、有鬥志兼且線路獨立嘅騎師，如果愈來愈多呢啲好手嚟香港客串，先至對香港馬圈有好處。至於呢隻「萬寶駒」，阿苗就話一早就知呢隻係好馬，只係需要啲時間畀佢成長，同埋佢話「萬寶駒」嘅父母兩線都擅跑泥地，今次特登轉嚟泥地1200米出擊，果然順利開齋。