神圣驹 对手普通

猪拉多纳

　　今日係女皇盃举行嘅大日子，希望天公造美，唔好横风横雨，影响气氛。今期韦达啲马唔算强，要小心取捨，咪盲椿椿去跟。反而，柏宝呢期好似会有运行，因为手上批马幾劲，但奉劝大家，虽然我认为佢啲马幾好，但捧唔捧得过，阁下要谂真，因为佢近日手风唔算好旺。

　　第二场四班1200米。「神圣驹」季内咩都试过晒，由短途跑起，又上过1400及1600米，而配件亦加加减减一大堆，同时，在跑法上也曾作出调节，但出嚟成绩平平，跑咗大半季都係得1P，话冇失望就假嘅，因为我觉得隻马三班应该都够跑！而最近两仗算演出稳定，冇错！係就係两场都做四哥，总算能保持到。由於呢场对手冇咁强，希望对争胜有帮助。

　　第七场三班1200米。「绰力之城」一连两场冇W有P，前仗赢批新马「神采商人」、「官仔骨骨」，就话證明唔多，但上赛四升三班仲可以跑第三，真係实力明證！头二名「山顶」及「芙蓉之宝」坐住二班实力，「绰力之城」输唔係好多，三班一样超。如果3岁仔唔係搏完两场有咩问题，呢场对手佢唔会放在眼内。

　　第九场二班1800米。「包装博士」适应水土後接连跑得出色，两场1600米非冠即亚，前仗输少少畀「驌龙」，到上赛力克「华美之星」，睇到隻马进度係三级跳。今场仍在二班角逐，有威胁嘅唔係多，如果应付到此程，有望再胜一仗。

　　资深评马人 陈华栋