六环断缆 同行凄惨

猪拉多纳

　　话说日前赛事散场时，一位相熟同行向我大吐苦水，呢件事可以称得上係惨遭「劫难」，因为呢位同行F，当日下注了六环彩（每关两匹），其中五关过晒，任凭头幾关爆得七彩，佢一样拣到「日日发」、「扬威宝」等冷马。至於断缆嗰关係第九场，飞起了「军事出击」及「傲男」，不幸所选马匹跑第三、四名，幾十万就咁擦身而过……凄惨！

　　感同身受

　　呢类切肤之痛，相信大家可能也遇过。记得多年前，洪某亦经历类似「劫难」，头关嘅选择跑第三名，之後二至六关全部赢晒，该期六宝派60万！跑完尾场，自己呻到六月飞霜咁滞。

　　投XWPQT，或是其他特别彩池，输个头、差一隻、名次调乱，总之，条飞就係冇钱收，呢类事情係我辈马迷成日有机会遇上（次次赢者例外）。但痛过，惯了，又下注，乃是长期作战模式。

　　其实，玩马要备课，做好事前準备之馀，运道同样重要。记得冇耐之前，在马场之内，亲眼见到一位填飞都未识嘅女士，在櫃台随口噏幾个马号，最後全部排队返嚟，赛後该女士身边友好兴高采烈向佢祝贺，仲问点解咁有心得，佢答曰：「纯粹买lucky number之嘛」。正所谓，一运二命三风水，唔到你唔信？！