大将军降班出头

猪拉多纳

　　周末又跑马，对上一个礼拜，连爆4、5隻冷W，睇到个心都震埋出嚟。希望今次赛果咪再反常，之但係，热门马死火有时好难避免，一来，季尾时分，捧热之马通常有近绩，但可能係搏到水尾，随时反艇！二来，今日一场雨，点知边啲实力马会应付唔到慢地，忽然冇影唔意外，所以，今日小注怡情吧！

　　第二场五班1400米。「大将军」连仗输得接近，但硬係赢唔到，隻马本身係有问题，譬如走规、跑法等，不过，降到五班冇理由唔够揪，季初同程仲输紧畀「摇滚雄豐」和「钢志」，呢对马之後赢晒，同时，攞住最近幾场四四五五赛绩，放在此场又唔使负重，点会冇级数，唯一担心係晋仔舞唔舞得掂，若然可胜任，出头有望。

　　第七场三班1800米。「靓好声」3个月冇出，角逐1800米一样入P，唔係蚀位衝，以佢拉士劲势，头二马真係冇佢咁强，明输形势而非状态。弱马难得短期再跑得，绝对係好事，当然，升班对手係唔同，但此驹实力本来在三班够赢，一旦养好健康，唔会怕任何强敌，如不是地慢唔识跑，确有冠军相。

　　第九场三班1400米。「信心十足」连赢两场四班赛，初出惊涛骇浪之下赢马；上场再出，末段以雷霆万钧之势再W，直路跑至中段，完全当对手冇到，那份气势唔係一般三四班马能够做得出。呢次升班再战，望真啲，是赛水準真係幾普通，如果隻马长力够扳至此程，只负125磅出战，实在着数，头马幾成囊中之物。

资深评马人 陈华栋