时来风送条件一流

猪拉多纳

　　上个礼拜六赛期，热门马算係表现比预期好，不过，赛事去到中後段，冷门又唔少，有时赌马就係咁，明知会爆都冇用，唔係咁易捉，亦唔会咁易避得过。呢期又会点？坦白讲，「上半场」唔係睇得咁通，所以，重心都係放在较後场次，希望赛事早段爆得七七八八，之後正路马可以纷纷抬头。

　　第七场四班1600米。「时来风送」今季初出已经好有走势，之後成热隔纱一场，翌仗遇冷即变身，後上跑入季军，而上赛继续跑入三甲，演出进入稳定期，估计未赢马交代前，唔会三心两意。若果今场一如所料，出现正常步速环境，以佢本身好档、状态好、路程合适等等条件，有力出头。

　　第九场三班1200米。「无惧风雨」真係好犀利，赢两场唔多使用力，初出抛甩对手，上场四升三班，捧到得十幾蚊，赔率真誇张，依然赢到轻易，实力的确係个谜，当然，跻身一班或更高层次係後话，至少知道留在三班係着数到晕！唔係有咩冬瓜豆腐，阵上跑出本有水準，呢场头马应该又会係「依丝温」。

　　第十场三班1600米。「红山茶」唞完一大轮，复出跑两场，名次冇变，一再做四哥，不过，刚仗明显有唔同，睇末段走势，如果早段唔係三叠多耗力，相信末段必定贯注得更好，点会最後位置也不保。今仗换上潘顿，练者摆明係唔服，转转手风希望会掂，如果计实力，跑出水準的话，隻马一定值二班，所以，赢唔赢到，好睇早段际遇。

资深评马人 陈华栋