轉播賽名牌唔係大晒!

猪拉多纳

歐美經典名牌，幾時都比雜嘜山寨貨受歡迎，只要望望廣東道各大名店門外人龍就一清二楚。不過世事無絕對，普羅馬迷口味原來同紳士名媛並不一致，以上季馬會大搞之轉播賽為例，新加坡、澳門尋常賽事投X額，居然高過晒葉森打吡、凱旋門等世界知名馬壇盛事，認真估佢唔到！
       
錢健明

上季馬會合共轉播100場海外賽事來港受注，並大收旺場。回顧整季投X成績，發現原來馬迷不一定鍾情鮑參翅肚高檔貨，反而只要口味親切啱心水，即使鹹魚青菜一樣頻頻下箸。講到親切感，有香港馬參與之賽事自然秤先，上屆最高投X額之三場轉播賽，正好全屬此類。當中三月底杜拜世界盃賽日，以馬王「雄心威龍」為首，聯同「軍事攻略」及「加州萬里」聯手出戰之杜拜免稅店盃，即錄得全季單場海外賽事最高總投X，接近三千萬港元，遠遠拋離同日焦點，地位及獎金均更高之杜拜世界盃。
       
摩加利
亞洲賽事包辦Top 5

第二、三位的日本安田紀念賽及新加坡新航國際盃，亦分別有「精彩日子」、「天久」、「續領風騷」等香港代表角逐；事實上投X榜前五名賽事全部在亞洲上演，似乎近水樓台先得月，鄰近地區賽事之吸引力，較歐美賽馬先進國家更高。
       

值得注意是第五位澳門沙地一哩賽，只屬當地三級賽；第四位新加坡賽事更是無名無姓的普通讓賽，兩者竟可將英國葉森打吡、法國凱旋門等經典大賽摒出前五名，所謂識馬之士們，會否覺得不可思議？
       

要數最接近，一水之隔的澳門地理形勢贏晒，上季澳港盃賽日轉播賽事增至六場，當中有四場投X額超過二千萬元，全日合計高達一億二千六百萬元，顯然頗受香港馬迷歡迎。假如澳門賽馬當年並非受制於香港禁止境外賭博條例而絕迹此地，各方可以互惠共存，如今發展潛力實在難以估計。
       
美國賽時間曳投X低

香港賽事主要跑草地，以泥地賽為骨幹的美國賽事先天吃虧，再者轉播時間為香港深夜，吸引力自然大減。上季馬會已放棄轉播馬壇盛事育馬者盃賽日，取而代之單場的肯塔基打吡，投X額仍錄得偏低的約一千萬港元，認真失禮。

另外值得一提的是，上季馬會由新航國際盃賽日開始引進孖T及三寶，預計新季海外賽事彩池將更多元化，迎合馬迷投X需要，同時馬會料將開拓更多具潛質之海外賽事市場，進一步讓本地馬迷放眼世界。