切勿长期与钱鬥气

猪拉多纳

　　一日被蛇咬，终生怕草绳！买马有时同样面对类似处境。应放唔放、应留唔留、发挥论尽、唔够机警，如阁下真金白银押注落去，输咗点会唔谷气？！我哋冇得去示威，亦冇得去平机会、消委会投诉，斩脚指避沙蟲，或係其中一个可行方法。有时唔係想做阿Q，但唔信邪又输一场，再买落去又「撇」，冇理由长期与钱鬥气啩。

　　未必人人识转膊

　　谷草赛事向来有偏差，你知，我知，骑师又点会唔知，佢哋落场跑，亲身感受到，比我哋纸上谈兵嚟得真实得多！但到头来，係咪个个识转膊，尝试去克服，原来未必囉。

　　所以，有时避开某啲有问号嘅赛驹，对投X上盈亏有着一定影响。譬如赛前谂唔到佢哋会点跑，或是未必应付到险峻环境嗰啲，唔好沾手，最终可能省回一笔。

　　像刚过去的周三夜赛，「咁都得」、「豁达潇洒」、「真慷慨」，让我们上了宝贵一课，而赛果正正带出呢个现实。

　　上述3驹全部係重飞而跑到冇P！怪唔怪得晒鞍上人？一半一半啦，因为我哋唔知策骑指示点畀，此其一；另外，赛事形势唔就，亦係跑得唔好理由。不过，骑师们有冇用心去解困，並在阵中随机应变，睇多幾次呢3场赛事片，大家自有更深、更透彻了解。