歡樂時光韋達走寶？

猪拉多纳

尋日第九場韋達本來有多匹騎開嘅參戰馬可以揀，最終佢選擇咗文家良馬房嘅「智高星」，放棄咗前個禮拜谷草一出即勝嘅「歡樂時光」，最終贏唔到兼全日守齋已經夠激氣啦，點知仲要畀勁敵柏寶冷手執個熱煎堆，間接幫後者完成全日三W，大演帽子戲法嘅好戲，難怪韋達落馬後行過凱旋門，見到佢望實準備影頭馬相嘅「歡樂時光」流露出不捨之情，應該唔似揀錯馬走寶，而係身不由己，一早應承咗騎「智高星」，唔可以推莊。
       
歡樂時光兩戰兩勝未逢敵手，大把世界。

「首飾」系馬主董滿輝呢排真係威盡馬場，雖然佢名下「首飾孖寶」同尋日列陣嘅「首飾多寶」，均先後以短距離飲恨，屈居亞軍，但佢嘅仔董智浩名下「歡樂時光」短短出道兩個禮拜內，已獲得兩戰兩勝嘅佳績，首次養馬已經咁好運，認真難能可貴。
       

董智浩話「歡樂時光」同「首飾多寶」係同一時間買入兼運到香港，雖然兩次賽事都無法兩父子嘅馬一齊勝出，略嫌美中不足，佢亦好開心呢兩匹馬出道短期內已有如此佳績，質素出眾，頭馬應該會陸續有來，稍後亦會逐漸增程發展。