姚本輝醒大哥哥

猪拉多纳

唔經唔覺又到咗2013年，換言之霍勵賢同薛寶力呢兩位只得半季牌嘅公司騎師，仲有一個月就約滿，前者第一次嚟香港策騎，暫時攞咗10W，睇嚟續牌冇咩難度，反而薛寶力就濕滯啲，跑咗四個月都係贏3場，手風唔順之餘又唔多馬騎，不過佢就好想留喺香港發展，而佢亦冇放棄，朝早一樣積極問啲練馬師攞馬嚟跑，希望爭取多啲支持。
       
大哥哥
新近谷閘掄元試準，質新馬熱身後有進。
爭崇山寶帥權觸礁

薛寶力早排就問過姚本輝，想攞番上季喺佢胯下一出即勝嘅「崇山寶」帥印，但呢隻短途新星啱啱先由蔡明紹操刀補中，好難無端端換番畀佢騎。但係輝哥不嬲都好欣賞薛寶力嘅騎功，今日就醒咗隻質新馬「大哥哥」畀佢，睇吓可唔可以把握機會贏馬？呢隻3歲澳洲PPG上鋪初出只係輸畀「四季星」同埋「飛哥」兩個半身位，之後呢兩隻馬夾埋再添3W，證明賽事水準好高，而「大哥哥」上月中試谷閘一放到底，熱身咗場進步一日千里，今次增程跑1200米，隨時可突如其來。