馬得利加程合理

猪拉多纳

　　快活谷馬場B欄C彎賽事，近期唔係太利後上馬，記憶中，比較多放頭馬跑出。有時又真係冇辦法，直路短，賽道經常唔利追，前領馬往往佔到先機，所以，騎師早段積極霸好位，隨時會有意想不到驚喜，就如以前南非好手馬佳善，跑法經常唔執輸，啲坐騎成日放返嚟。

　　第四場第四班1000米。「好利佳」跑法可以有變，放頭及後上一樣掂，今次2檔出閘，估計小將唔會再留，應該積極去搶好位，之後由外側放頭馬先行，賺晒貼欄包廂位置。

　　另一方面，由於「好利佳」腳患嚴重，唔知幾時復發，近期跑得操得，唔會唔好好把握機會贏番場，而隔晚賠率熱晒，呂君一樣咁好叫座力，點會唔搏甩髀。

　　第五場第四班1650米。「馬得利」之前經常慢閘一樣有走勢，近仗好啲已經贏馬，上場雖然唔上名，後上唔係冇勢。再三睇過上賽表現，如果再跑短途，可能追唔切，加程一試唔老襯。

　　當然，「馬得利」有兩點要擔心，其一，排外檔，令早段攞位有困難；其二，初上一哩氣量得唔得。所以，鍾意佢，亦唔值太熱，4倍左右，先好買。

　　奇勇形勢大好

　　第八場第三班1200米。「奇勇」3歲馬連贏兩場，直路賽愈斜跑愈衝得勁，上場升班及轉谷草，仍可力壓路程好手「捉金」，絕對係水準之作，相信呢匹馬將來二班都有馬贏，今仗仍留在三班，自然着數。

　　今仗繼續排好位，形勢有利，有力保持不敗。