賽駒冇飛凶多吉少

猪拉多纳

　　賽駒賠率冷熱，未必完全係成績好壞關鍵所在，99倍「魅力知己」和「好健康」，可以爆得出；獨贏熱至18、19蚊「加州萬里」和「雄心威龍」，馬王級又如何，可以跑到冇P；1.4倍「紅衣巨龍」，也可以順利勝出，並暫時成為季內最熱W。

　　之但係，有部分賽駒，如果在隔晚、賽日及開賽前十數分鐘（最後三兩分鐘調節不計算），賠率一直比預期冷落，呢類馬通常凶多吉少。有冇咁大隻蛤乸喺草地四圍跳？唔係冇，但為數少之又少。

　　與其硬係要從黑暗中尋找曙光，倒不如避得就避，明知心水馬冇飛，硬要「樁」個頭埋去又有乜謂？！難道要證明自己眼光獨到？個膽生毛？人做我唔做殺出新血路？知易行難乎。

　　賠率冷落係預警

　　唔理賽駒最終係因咩事表現普通，總之，結果比過程重要，賠率冷落已經係預警，有時唔能夠視若無睹，季初時分尚且唔使太介意，來到季中階段，點都要作為臨場取捨要點之一。

　　雖然勝負不由人，慳得一注得一注冇壞啫，起碼冇輸得咁冤枉。