手執多匹惡馬 潘頓食大三元不奇

猪拉多纳

　　跑至3月，韋達氣勢完全蓋過潘頓，單在最近3期已擸走6W，比起久不久「日行一善」嘅潘頓，真係蚊髀同牛髀。正如踢足球，輸人唔好輸陣，剎那被過頭，唔代表無力反先，最緊要鬥志唔好失。

　　漫漫長路，依家至係3月初，尚有三十幾四十期，馬季始結束，潘頓大把機會追數。以今期為例，出馬比韋達多，而且好多係揀手貨，今日連中三元，或四喜臨門，一點不意外！

　　潘頓今日8匹坐騎之中，其中3匹係新勝而臨，尚有3匹近績穩定，如果命水好，贏三兩場真係閒過立秋。

　　第三場「小母牛」，跑5場未甩過前兩名，準到無倫，上次轉爭直路賽一樣贏馬，勁到不得了，回升二班，對手又唔再係「太陽好好」，可以擔正。第九場「佳音」，一出即贏，根本唔係短途馬，也可應付1000米，實力唔簡單，在三班唔會失勢。第十場「錦繡河山」，兩出非冠即亞，級數甚高，負輕磅應戰，後勁或更強。Jack