花月佳期未見底

猪拉多纳

　　睇開阿棟專欄都應該清楚，但凡落雨濕濕日子，我都唔建議搏命，翹埋雙手睇跑馬便算，事關場地唔正常，熱門實力馬好容易被「淋熄」。馬季83期咁多，為乜要在呢種險峻形勢出手，真係犯唔着。若然好有心水，一百幾十了件心事，則合情合理。

　　第三場三級賽1000米。「花月佳期」大前仗入Q，前仗跑至氣管有血大敗，上場休出又掂，今次會唔會龍變蟲？我都唔知，但睇佢上場贏馬過程，好似仲有分喺手，何況，今場對手來來去去又係「跑寶貝跑」、「崇山寶」，只要跑出本身水準，有力捧盃。

　　第七場四班1400米。「首席」年青躁底，前仗曾經因閘前發脾氣退出，但係上場臨場行圈定咗好多，短期內有幾明顯進步，大摩呢類優質後生馬，往往表現可以突飛猛進，既然上場已經有接近走勢，唔排除今次又會繼續進步；排2檔起步，早段如果積極搶前，跑法略比前主動，隨時有更佳效果，再睇埋隔晚已成熱，有晒動靜。

　　第九場三班1200米。「同個夢想」外型標緻、腳法凶悍，且外地跑得唔多，預期來港後會有好大進步空間，近兩仗可以話係牛刀小試，已經交出季殿各一，潛力已有證明。今次唔轉路程，可見找對了出路，再跑應該比前進步，落入柏寶手上，發揮固然唔比馬偉昌失色，可能猶有過之，一日未交代，點會唔搏到贏為止，鬥志可信。