左右逢源見真章

猪拉多纳

　　如果大家細心望清楚今日各場形勢，有部分熱門馬係因人而熱，唔好理最終贏或輸，開出個賠率好唔抵係事實，呢種情況最「蝦」人賭，因為，熱門嫌冇味，卻又唔捨得放手，好似焗揀之局。咪話阿棟唔提水，但凡遇到呢種情況，小心為妙，切忌過於自信。

　　第三場四班1000米草地。「勇敢福星」初出跑第二，同日另一場四班賽由廐友「如你所願」勝出，好明顯當日蔡神仙係想兩匹新馬一併出擊，由此反映，此馬前景唔會差。今次繼續跑直路賽，衰就衰在排內檔，早段能唔能夠移到去出便，將成勝負關鍵，若果順風順水，早段霸到前列好位，稍為比初出有點進步已夠贏。

　　第七場三班1200米泥地。「左右逢源」二班一再跑得接近，前仗曾經跑獲季軍，插二班唔係有太大壓力。至於出道初期成績普通，歸咎於脾氣唔好，所以，胡森好早已安排此馬戴頭罩。及至上場行圈所見，隻馬動靜對辦，明顯係有轉變，雖然都係跑輸，可能係未降班，跟多場而已。今次復降三班便縮程，柏寶輸完唔肯放手，係龍係蟲睇埋今場！

　　第十場三班1800米。「品學兼優」前景一定美好，一二班必可立足，三班更加冇可能有阻力。上場熱倒係意外，不過，嚴格嚟講，韋達同樣要負上責任，唔係太過老定，點會轉直路彎之後出現自困之局。希望今次佢老哥醒醒定定，交出超班馬真本領。