ＡＣ全力贏玻冧太子女

猪拉多纳

本周意甲其中一場大戰為AC米蘭主場對拿玻里，近日意大利盛傳貝魯斯干尼會全身退出政商界，正準備將旗下所有資產放售及轉讓，當中包括意甲球隊AC米蘭。不過佢個千金芭芭拉即時企出嚟澄清，話家族從來都冇諗過出售球隊，仲公開表明老竇已經同佢講咗，將來AC米蘭會由佢揸旗，本周對戰拿玻里更會親自入場督師。芭芭拉突然咁高姿態，擺到明係向AC米蘭所有職員確立身分，尤其係向「大丞相」加利安尼警告，咪以為可以為所欲為甚至謀朝篡位。依家AC米蘭職球員人人自危，落到場肯定付出百分百，以免畀芭芭拉有機會抽秤，主W可以捧場。

（中央5台周一凌晨2時45分直播）
拿玻里保「二哥」搏拳

AC米蘭今場有巴洛迪利停賽，但球迷唔使替佢哋擔心，事關前鋒艾沙拉維一樣咁弗。之前AC米蘭約咗一支摩德納區嘅丁組球隊Virtus Pavullese進行拍跳，前鋒艾沙拉維狀態大勇狂入四球，最終協助球隊以13比1大勝。弗爆「小法老」將聯同柏仙尼或者麥巴耶尼安合作攻堅，AC米蘭前場火力仍然強大。對手拿玻里目標係力保聯賽榜第二位，以直接躋身來季歐聯32強，故今場仍會以勝利為目標，絕唔會有半點退縮。主客雙方都全力進攻，好容易交出入波，大盤亦可留意。