韋達連場數胡

猪拉多纳

　　韋達今日停賽期滿復出，宿敵潘頓在其停賽兩期贏馬不多，只係得兩場，目前仍然相差6場之多，而今日一戰，韋達牌面馬多，又會係數胡之日，至於，贏到幾多場？起個孖，會係最低要求。

　　今日韋達8匹坐騎，當中3匹來自蔡廐，另外5匹分別來自5個唔同馬房。或者捧場客有兩期冇見佢，隔晚特別踴躍，最冷已經數到「金獅猛將」，亦只得9倍，餘下7匹，熱至3倍以下多達4匹，而最熱當然係四出四捷嘅「紅衣巨龍」，隔晚曾經熱至1.7倍獨贏、1.0倍位置。

　　講開「紅衣巨龍」，跑4場贏4場，查看此馬勝出同日，韋達通常會係大豐收，全日必可擸走三兩W！唔通呢匹馬腳頭好？旺氣照住佢，真係不得而知，且看今日是否又係同一境況。

　　其他實力馬之中，「聖樂邦」及「驪龍」，搏來搏去未贏，係就係冇運，勝在有鬥志，前駒難得隻腳冇事，唔會忽然收手；後駒剛賽輸在意外，只要今日場地唔係不利後上馬，有力開胡。Jack