保頓主場勁爆添食

猪拉多纳

米杜士堡患「恐客症」

今日阿King主要同大家傾英冠，米杜士堡作客曳到冇朋友，當然要追住佢哋嚟反！今輪米堡造訪保頓，佢哋一離開主場就唔識踢，近十四次作客輸咗十二場，落敗率高達八成六。咁啱保頓爭緊入前六，而且主場特勁，主Ｗ有1.68倍，大家有買趁早！

（周六晚10時開賽）

以米堡人腳，根本就係升班之材，安尼斯、史葛麥當奴、麥伊治蘭、活基治個個有卡士，但好衰唔衰患上「恐客症」，領隊莫比利都冇晒計，所以帥位飽受壓力，唔少「米粉」都想佢早走早着。依家米堡其實只少第六位嘅李斯特城六分，但都冇乜球評家睇好佢哋有機會踢升班附加賽。相反保頓季尾有心有力，主場已經七連勝，當中贏過侯城、白禮頓，呢個主Ｗ值得捧場。

另一場白禮頓主場對黑池，自從前英格蘭國腳恩斯接掌之後，黑池硬淨到暈，點睇都好難輸，而白禮頓攻力亦唔多夠，預料戰情會形成膠着狀態，所以捧「半場和」。
列斯聯新帥效應「明」醒你

最後列斯聯作客伯明翰，列斯聯新帥麥達莫亦係有料之人，一接帥印已經取得兩連勝，作客都未驚過，敲「讓球客勝」。