廠仔搞唔掂富咸

猪拉多纳

跌Watt神經刀遇剋星

英超依家排第3至第6位嘅車路士、阿仙奴、熱刺同愛華頓都有機會爭下屆歐聯資格，嚟緊每1分對佢哋都好重要，爭得咁緊湊真係好睇過戲。不過兵工廠今晚喺倫敦打吡作客鬥富咸，小弟就冇乜信心佢哋可以全取三分喇。皆因阿仙奴今季最大問題係部分主力表現「神經刀」，今場對住主場極惡嘅富咸邊度讓得起，一於要2.15倍「讓球主勝」！

（有線200及300、廣東體育周六晚10:00直播）

阿仙奴自從歐聯16強次回合贏過拜仁慕尼黑後，成隊波信心即時返晒嚟，仲踢出5連勝添！不過周中悶和愛華頓就突然斷纜，法國前鋒基奧特錯失多次入球良機係罪人，禾確特近期又明顯冇咗上半季嘅銳利，連前排翻生嘅謝雲奴呢兩場又靜番晒，加埋普多斯基長期坐冷板雪到硬咗，近期嘅連場大戰亦消耗好大，呢班「神經刀」球星明顯跌緊Watt，今場作客好難踢。
阿仙奴下季細路飛只售百元

領隊雲格賽前話好有信心兵工廠最終可以殺入前4名，不過球員當中除咗中場辛迪卡索拉同阿迪達長期保持水準外，其他今季都係時龍時蟲，最弊呢對「西班牙孖寶」由開季踢到依家幾乎無抖過，今季分別踢咗41同37場，上陣最多就係佢兩個喇！今場佢哋又要迎接8日內第3場波，如果呢兩個中場核心回唔到氣，阿仙奴都幾大鑊！可能知道隊波唔掂，阿仙奴尋晚宣布下季會開設細路看台，每張飛只收10英鎊（約110港元），希望吸納多啲Fans，《標準晚報》估佢哋因為咁會蝕成40萬鎊。
富咸英超交手4戰不敗

主隊富咸依家雖然冇乜好爭，不過佢哋成績反而好咗，尤其主場出擊更加唔講得笑，近7場主場有5場保持不敗。咪話唔提你，富咸近4次喺英超對阿仙奴都未輸過，首循環作客和3:3，倒戈中場薛維爾喺呢4場波入面2場有士哥，今場佢咁啱坐完波監復出，隨時就做埋母會爭入前4嘅攔路虎。
兩隊交手旺開大

‧阿仙奴連續6場不敗。

‧兩軍近6次對碰5次開大。

‧兩軍近4次交手富咸取得1勝3和。
富咸打吡「大」得起

富咸已經攞夠40分，基本上都唔需要擔心降班，班球員隨時踢得更爽。對手阿仙奴要爭前4，肯定盡力爭取入波唔會手軟。翻查紀錄，今季富咸主場惡戰車路士、熱刺同韋斯咸等倫敦球會，全部都出現至少3個入球，尤其富、阿兩軍近年交鋒亦傾向開大，1.65倍入球大睇怕都係走唔甩。
頂占筍盤：富咸（讓球主勝）