東京格食格「主」熟鯨魚

猪拉多纳

今日嘅日職冇乜邊隊畀到人特別有信心嘅，就算（六）8「一哥」橫濱水手作客新潟天鵝，都令人覺得唔穩陣，左揀右揀，一於博（六）3嘅FC東京對名古屋鯨魚個2倍W，因為個盤口有些少奇怪。
鯨魚球星扮鐵甲奇俠

FC東京聯賽4連敗，鯨魚就4戰3勝1和，數據反映出嚟主隊完全輸晒畀客軍，難怪鯨魚呢排好風騷，趁住「鐵甲奇俠3」响日本上畫，同名古屋鐵道等3個企業合作，喺車站入面放晒宣傳海報，楢崎正剛等幾個球星仲扮晒鐵甲奇俠，但係佢哋搞咁多嘢，主要係為咗下星期主場對廣島三箭場波，今個禮拜作客呢場就冇乜動作喇。

一場近況差咁遠嘅對戰，按道理冇人會揀FC東京，不過奇怪嘅係，日本Toto 7大媒體嘅推介，居然係主勝有3票，和同客勝都係2票，而且足智彩個3.05倍鯨魚客勝畀人覺得太筍，東京要讓平半更加奇怪，綜合去睇即係話東京似乎贏唔到都未必要輸，況且東京有鋪打魚癮，近6次主場對鯨魚，取得3勝2和1負，無論隊波衰到點，對親鯨魚就嚟料，咁點解唔玩大啲，博主W呢？