教頭鬩牆撐水戶蜀葵

猪拉多纳

日乙今日爆發兄弟對決，北九州向日葵主帥柱谷幸一喺主場領軍面對佢細佬柱谷哲二執教嘅水戶蜀葵，有婦之夫柱谷幸一03年苦戀「G奶」電視主播古瀨繪理，就係呢段不倫之戀斷送大好前途，三個字，衰好色！佢今季再獲機會擔正執教向日葵，決心重新做人，呢次兄弟鬩牆成為日本球壇焦點。

（周日中午12時開賽）

柱谷幸一嘅人生本來同好多退休球員差唔多，收山後教波，屋企有個老婆，仲有兩個女，生活安穩而沉悶。佢01年隻身去咗山形縣執教山形山神，認識改變自己一生嘅女人──宅男「G奶」女神古瀨繪理。柱谷為人有風度，古瀨畀佢深深吸引，男主角亦迷戀女方G級身材，忘記家中妻女，展開咗不倫之戀。兩人愈踩愈深，不能自拔，終被傳媒踢爆。柱谷被球會問話時死口唔認同古瀨相戀，自己攬晒上身，結果冇咗份工，更被標籤為感情有缺失嘅賤男。
柱谷幸一衰「不倫」冇運行

日本性觀念開放，但職場上對道德觀念好看重，柱谷幸一個朵臭晒，往後只能執教京都不死鳥同櫪木SC等細球會，冇乜機會發圍。佢08年離開櫪木，之後試過喺浦和紅鑽做總經理，但都做唔長，今季北九州向日葵搵佢領軍，佢直頭當球會管理層係再生父母，呢次係佢領軍生涯最後餐士，若然都唔掂，可以疊埋心水轉行！

柱谷幸一有心挽救事業，但佢冇教波咁耐跟唔上時代步伐，加上只係帶住日乙三線隊向日葵，前景並唔樂觀。佢細佬前日本國腳柱谷哲二近年執教水戶蜀葵亦冇乜作為，撈極都撈唔起，兩兄弟都係咁兜踎，呢次正面交鋒和味濃，向日葵讓波難靠，推介「讓球客勝」。