英超改善青訓刻不容緩

猪拉多纳

近年英超喺歐戰地位僅次於西甲，之前八屆歐聯決賽，七次有英超球隊身影，08年更由曼聯同車路士喺莫斯科上演同室操戈，但今個球季去到轉彎入直路，曼聯、阿仙奴早早喺歐聯16強止步，依家剩番「獨苗」車路士殺入歐霸4強，一眾「英」雄集體低迷，畀西甲、德甲搶晒風頭。

睇番季初至今，只係得由費格遜領導嘅曼聯喺3月前表現較為平穩，阿仙奴領隊雲格依然係愛錢多過成績，曼城主帥文仙尼雖坐擁頂級人腳，但臨場指揮欠B計劃為人詬病，車仔靠江郎才盡嘅賓尼迪斯蛇都死喇，熱刺少帥保亞斯仍需累積經驗，至於利物浦教頭羅渣士冇自知之明，學巴塞踢「地上足球」，可惜冇「三劍俠」美斯、沙維同恩尼斯達，畫虎不成反類犬，踢法迂迴令對手夠時間回防，射手蘇亞雷斯唔係場場都能夠單天保至尊。
外援充斥 土炮難出頭

上述主帥各有缺點，英超需要有更多好似費Sir咁高瞻遠矚、老謀深算嘅英明領導。另一方面，英超經常重金羅致外援，令本土年輕球員難有出頭之日，韋舒亞、菲爾鍾斯有質但易傷，韋碧克係未達到奧雲、朗尼般級數嘅士哥拿，當一流中堅泰利、里奧費迪南年華老去後，亦發現後繼無人，與德甲超新星馬高列奧斯、馬里奧葛斯、達斯拿等火速崛起，形成鮮明對比。因此，英超賽事依然精彩，收視又高，但若想在歐戰捲土重來，改善裹足不前嘅青訓系統，實在刻不容緩。

今季英超好時間 好收視 唔好成績