AC「Punk頭三叉戟」崩咗!祖記「讓主」玩得過

猪拉多纳

祖雲達斯喺歐聯雖然畀拜仁K.O.，不過返到意甲就持續強勢話晒事，家陣拋離「二哥」拿玻里11分，當中胡仙歷同維達爾近排仲着晒火，今晚有福星球證盧卡班迪高照，主場迎戰「Punk頭三叉戟」分崩離析嘅AC米蘭，祖記2.65倍「讓主」咪錯過！

（中央5台周一凌晨2:45直播）

祖記箭頭胡仙歷喺聯賽主場鬥佩斯卡拉梅開二度之後，中場核心維達爾上輪作客拉素亦唔執輸起孖，狀態弗爆為「斑馬兵」締造聯賽5連勝。至於由邦路斯、巴沙利同比路素所組成嘅防線守力唔差，就算後防主力基亞連尼未必趕得切復出都唔怕，而且上場出任進攻中場嘅馬治斯奧表現搶眼，有源源不絕嘅輸送，胡仙歷要搵食唔難吖！

不得不提嘅係，今場執法球證盧卡班迪絕對稱得上係祖記幸運星，佢過往16次主吹祖記賽事，包括今季作客6:1大炒佩斯卡拉同主場4蛋相贈烏甸尼斯，祖記埋單合計贏咗11場，贏波率接近7成，堪稱祖記「御用球證」。
「御用球證」執法勝率近7成

AC米蘭「坐三望二」目標明確，可惜近兩場面對費倫天拿同拿玻里，同樣喺領先優勢下被逼和，錯失壓過拿玻里做「二哥」嘅大好時機，最弊嘅係呢兩場都有波入嘅法米尼今場停賽，加上奇雲保定需要養傷，對於AC中場組織能力有一定程度影響。

巴洛迪利早前因為辱罵球證被追加停賽兩場，雖然AC上訴後獲減刑至1場，但今晚都要坐波監，再者艾沙拉維近排畀傳媒揭發掛住瘟女夜蒲「腳仔軟」，早排令人聞風喪膽嘅「Punk頭三叉戟」剩低麥巴耶尼安，咁嘅陣容同狀態硬撼祖記分明以卵擊石，輸鑊甘唔奇。
「腦殘」有獎唔攞留隊加操

AC米蘭日前喺官網宣布，原定會喺嚟緊星期二去美國出席《時代周刊》頒獎禮，領取「2013年全球百大最具影響力人物」獎項嘅巴洛迪利，因為獲減刑決定取消行程留喺意大利加操，準備喺對卡坦尼亞場聯賽以最佳狀態復出，「腦殘」終於大個仔咯！