「半決賽」戲碼神奇兼夢幻

猪拉多纳

國內傳媒將準決賽稱為半決賽，今屆歐聯半決賽係夢幻組合，地上最強巴塞硬撼今年表現最機動、最好嘅拜仁，另一邊皇馬抽到鬥多蒙特，兩個名帥莫連奴及高普過招，同樣有睇頭！咁嘅組合有機會喺決賽上演同國球隊打吡戰，亦有機會由西班牙同德國各出一隊爭冠，相信主辦單位同球迷都覺得四強抽籤係神奇哋理想。

周三凌晨戲碼係令香港球迷捱眼瞓都要睇嘅大戰，大家都知拜仁最近連續兩場輕描淡寫入對手半打，喺德國聯賽同盃賽以雷霆萬鈞之勢獲勝，呢隊波三線實力平均，進攻有快馬洛賓同列貝利，板櫈深度夠，有條件同巴塞鬥組織。巴塞有番美斯、恩尼斯達同沙維呢個進攻鐵三角，當然都好強啦，不過，Peter始終睇高拜仁半線，就算佢哋首回合喺主場冇甜頭，兩回合計都可於一百八十分鐘晉級。
拜仁「冠軍」　有分頭值博

另一個組合皇馬擁有星級將帥莫連奴同Ｃ朗，加埋幾個超級球星壓陣，級數好高，多蒙特雖然如日方中，但都好難招架。Peter較為睇好拜仁同皇馬，預期佢哋會喺決賽碰頭，高手過招，打得愈多愈難爆冷，去到決賽一戰定高下，精彩刺激，呢個就係歐聯扣人心弦嘅原因。睇番足智彩冠軍賠率，唔計多蒙特，三強之中拜仁有3.7倍最好分，巴塞得2.5倍，皇馬3.1倍，橫計掂計，拜仁冠軍都好值博！

歐霸盃方面，車路士教頭賓尼迪斯同班球員好心就幫油王拎埋呢隻盃啦，阿布入主球會近十年，贏盡英格蘭國內所有盃賽，仲捧過歐聯冠軍，拎埋歐霸盃就真係完美喇，今季佢哋成績麻麻，但若然拎到呢個安慰獎都幾有意義。車仔準決賽只係對巴素利，對手唔難應付，要贏就睇鬥志，同埋教頭賓尼迪斯仲識唔識調兵遣將喇，千祈唔好睇小呢隻有着特別意義嘅獎盃啊！
金句：夢幻的半決賽組合！