水手掛住慶祝益藍翼

猪拉多纳

亞冠盃分組賽今晚有場（二）3好戲，篤定出局嘅水原藍翼喺H組主場對住要爭出線嘅中岸水手，揀主勝似乎仲着數，事關藍翼有鄭大世翻生喺韓職大演帽子戲法，水手剛啱成為澳職總冠軍，球員掛住慶祝，好易出事喎！
鄭大世回勇上仗入3粒

揀呢場，除咗有直播希望大家玩得開心啲，最主要係北韓射手鄭大世終於開始發威，今季佢加盟水原藍翼，起初表現唔掂被球迷喪噓，仲試過喺亞冠盃對柏雷素爾連續射失兩球12碼，搞到信心盡失甚至話想自殺，依家好啦，佢企番起身連中三元帶挈藍翼打爆大田市民，一天都光晒，隨時又入波o架！

另方面嘅中岸水手早兩日喺澳職總決賽以2:0打沉西悉尼流浪者，打破宿命歷史性封王，弊在中場約翰赫捷臣同賓特格菲斯今場要坐波監，要知道水手後備力量唔強，突然要讓兩件主力，唔驚就假，加上佢哋登上總冠軍寶座，隨時係有今生冇來世，我又唔信佢哋啲球員捨得唔慶祝，備戰工作肯定受影響啦！

亞冠盃H組

猪拉多纳