喜逸形勢有利

猪拉多纳

　　今晚有三兩場賽事，望落真係唔開胃，一來，賽事水準極普通，完全冇心機去諗，二來，已經難以入手，買中又未必好分，所以，奉獻各位唔好亂嚟，今晚咪「三心兩意」，心水宜一場起、兩場止，同時，不宜大大注，買少少，頂住心癮便算。

　　第四場四班1200米。「喜逸」今季跑了5場，連Q腳未跑過，質素唔會高得去邊，除非下季進步神速，到時再算，如果唔係，頂多係四班中堅。今次揀佢原因主要係對手弱，而佢排到好位，轉回谷草又比田草較易搵食，同時，希望杜利萊硬功搭夠，能為呢匹馬贏得處女勝利。

　　第六場三班1200米。「大寶藏」轉到阿航之後，至少初出跑得接近，接手後唔係嘆慢板。上場忽然水準大跌，可能路程唔合腳法，難得輸完1場咁甘，大敗約10個身位之後，潘頓仲肯操刀，唔排除係人情債，不過，要推庄冇理由推唔甩，應該係心中有馬。

　　今場再跑谷草，對手冇田草咁惡，到底係龍係蟲，跟埋今場。

　　第八場三班1650米。「神聖火炬」今季幾乎場場搏，係得大前仗初升三班跑到冇影，呢匹4歲馬，對佢有點期望，如果冇睇錯，下季至會係黃金期。當然，現時在三班，唔需要進度好好都夠殺。比較近兩仗賽事，上場演出進步明顯，估計今場若狀態再進，已有贏面，尤其由田草轉谷草，對手冇咁強，同樣增強本錢。

　　點買法

　　「喜逸」係全晚最喜歡1匹，但先小人，後君子，始終係處女馬，唔易贏，賠率太熱不宜博，5倍左右始值得買WP。至於QT重心，放在尾場，應該係幾匹熱門大鬥法之局。