加斯拿素靠高原收拾「國民」

猪拉多纳

南美自由盃16強首回合聽朝繼續開戰，秘魯嘅皇家加斯拿素喺主場對烏拉圭嘅蒙特維多國民隊，主勝1.58倍熱都抵捧。首先加斯拿素主場位於庫斯科，高原地帶絕對唔易踢，其次蒙特維多有隊長列高巴養傷，作客好易出事。（開賽時間：周五早上9:15）
蒙特維多王牌列高巴打柴

皇家加斯拿素喺今屆自由盃分組賽主場，贏過祖安奧列治同波特諾，雖然佢哋分組賽前有射手安迪賓度同隊長雷蒙洛迪古斯離隊，但依然能夠出線，就知高原主場威力唔係講笑，換血後依然唔可以睇小。加上來自波特諾嘅中場奧斯卡甘馬拉最近好番，主場出戰唔會怕任何對手，捧得過。

對手蒙特維多認真運滯，最近有隊長列高巴同射手艾比奧受傷，據講佢哋都冇隨隊，實力大打折扣，特別係全盛時期効力國際米蘭嘅列高巴缺陣後，最近蒙特維多喺自由盃同聯賽都贏唔到波，狀態同信心明顯受到打擊，今場更加唔知搵邊個孭飛好，與其盲目信名牌，不如吼實加斯拿素好過啦！
自由盃賽制

16強淘汰賽分主客兩回合制，今輪為首回合賽事，若兩回合賽和則計算作客入球，若未分勝負即互射12碼分高下。