貝迪斯爭踢歐洲賽做「科」騷

猪拉多纳

貝迪斯今晚喺西甲主場迎戰拉科魯尼亞，1.71倍主勝值得熱捧。首先貝迪斯仲要搶分爭踢下屆歐洲賽，斷估主場唔會玩嘢，其次係拉科有射手里基扭計離隊，據講佢已經傾掂下季轉投奧沙辛拿，呢場未必肯搏囉！

（now632台周二凌晨4:00直播）

唔計周日賽事，貝迪斯只不過落後第6位嘅馬拉加2分，而且中場拿祖同中堅馬里奧已經復操，能夠復出為貝迪斯搏殺，難得有機會重返歐洲賽，相信佢哋唔會揸流攤。數吓手指，原來貝迪斯已經有7年冇出席過歐洲賽，對上一次係05/06年球季踢歐聯，依家有機會去掘金噃，試問班領導層仲唔發晒茅，落「柯打」要班球員做嘢咩，主場撐得過喎！
拉科里基扭計走人損軍心

另一方面，徘徊喺降班邊緣嘅拉科雖然突然大爆發，近5場錄得4勝1和，弊在後衞馬真拿同羅利沙拿比亞仲未好番，作客未必惡得出樣。仲有呀，今季攻入12個聯賽入球嘅射手里基，據講已經同高層攤牌要走人，而且同奧沙辛拿傾掂喺暑假轉會，呢個時候大難臨頭各自飛，隊友聽到實冇癮，近期旺勢隨時就咁玩完。