香港至尊變招搏

猪拉多纳

　　跑到五月，仲有兩個月左右又告暑，同時又踏入雨季，所以，呢兩個月裏，好多時都會雨中作賽，今次應該唔會例外。落雨跑馬已經難搞，何況，今日好多場唔知如何入手，諗到頭都大埋。行文至此，又到阿棟例牌語句，今日不宜搏命，一百幾十玩無妨。

　　第二場五班1000米草地。「名城」臨場經常會自己緊張起，可能係導致遲遲未贏原因之一。但睇佢在五班賽表現，多多少少有優勢，今次回降五班，轉攻曾入Q直路賽，改用10磅小將及排外檔，同樣係有利條件，畀佢早段順走，一口氣帶到唔係冇可能，如果賠率在6、7倍左右，大可贏位兼投。

　　第七場四班1650米泥地。「香港至尊」跑慣1200米，卻已沒有突破，一再出現遲來一步鏡頭，如果唔去求變，可能歷史繼續重演，苗禮德安排此馬增程至一哩，係就係大幅加程，氣量未必到，總好過再跑短途，起碼有得博。而睇隻馬之前幾場入圍，末段加速力可用恐怖形容！如果跑長一樣有咁上下衝刺力，末段邊匹對手可以頂得住！

　　第八場三班1200米泥地。「如你所願」唔係質素高，蔡神仙斷唔會轉來轉去，先贏田草，再贏田泥，實力在三班必可立足，尤其目前負磅不重，以及排檔有利，減低升班壓力。再看隔晚票數賣到十幾蚊，賠率低到馬王級價錢，完全反映爭取三連捷信心。