巴塞玩火半場博大霧

猪拉多纳

喪攻拜仁 兩閘齊開

巴塞主場玩火！歐聯準決賽次回合，巴塞隆拿主場迎戰拜仁慕尼黑，呢場世紀戰因為巴塞首回合作客慘吞四蛋，變咗懸念大減，巴塞想收復失地就要豁出去，一開波即喪攻，目標係上半場起碼都追兩球，不過面對反擊犀利嘅拜仁好難保持不失，今場入球大熱到得1.43倍冇肉食，反而1.5球中位數嘅半場大盤有2.05倍值博得多。

（有線61、64、201及203台周四凌晨2時45分直播）

首回合落後0:4，歐聯史上仲未有球隊試過可以逆轉，拜仁進身決賽嘅賠率熱到得1.001倍，足見巴塞已經瀕臨絕境，不過賽前無論球員、官網同傳媒都聲稱拒絕投降，教練維蘭路華勢必晒冷搏殺，根據西班牙《每日體育報》同《世界體育報》預測，巴塞會安排右閘丹尼爾全面壓上，喺進攻時出任右中場甚至右翼，陣式隨時會由原來嘅「433」變成「343」甚至「334」，巴塞喺魯營球場嘅九萬fans支持下會一開波就會瘋狂進攻，不過如果上半場唔能夠將比分拉近兩粒或以上，要創造奇迹嘅機將會更加渺茫。
丹尼爾壓上易輸反擊

維蘭路華呢種冒險形同玩火，丹尼爾固然負荷極大，而且今仗防線亦唔齊人，除佩奧爾同馬斯真蘭奴繼續養傷外，左閘佐迪艾巴停賽，防守中場布斯基斯亦要帶傷上陣，如果丹尼爾壓上，變成兩閘齊開，拜仁一雙魔翼隨時偷到雞，尤其拜仁左路嘅列貝利同阿拉巴無論速度、技術同默契兼備，巴塞瘋狂谷上好易輸反擊。另一方面，拜仁士氣如虹，主守亦唔係佢哋強項，今場唔會過分龜縮，雙方喺上半場都會有唔少入波機會。
28倍「主客」刀仔鋸大樹

巴塞博大霧，黑柴亦想博大霧，今場預計巴塞可以喺上半場領先，但從首回合所見佢哋球員體能遠遜拜仁，加上美斯未弗番晒好難踢足全場好波，末段隨時後勁不繼，但又要焗攻，分分鐘畀拜仁憑反擊反噬，喜歡刀仔鋸大樹嘅朋友，可以小試有28倍嘅半全場「主客」。
晉級條件(拜首回合勝4:0)

巴塞晉級

‧淨勝5球或以上

‧勝4:0，需加時決勝負

拜仁晉級

‧勝或和

‧以1球、2球或3球差距落敗

‧以4球差距落敗、但取得作客入球

‧負0:4，需加時決勝負