小保加低潮難啃哥連泰斯

猪拉多纳

本周繼續上演南美自由盃16強首回合賽事，其中一場由阿根廷小保加主場硬撼巴西哥連泰斯。雙方同屬南美洲名牌球隊，可謂今季其中一場重量級16強賽。留意到小保加近期演出令人失望，球隊無論狀態及士氣都處於谷底，就算主場出擊亦欠取勝把握。相反哥連泰斯近況就好得多，透過州聯賽打起了勢頭，有能力令主隊吃苦頭。小保加讓波不值，「讓球客勝」可捧。

（周四早上8時50分開賽）
客軍柏圖蓄勢待發

哥連泰斯能以小組首名資格打入淘汰賽可謂相當合理，事關陣內人腳絕唔簡單，包括前ＡＣ米蘭前鋒柏圖。初時佢喺意大利表現都幾好，弊在後生細仔容易受情感影響，先後離婚及搭上太子女芭芭拉，私生活令佢唔能夠集中精神比賽，連帶表現亦都下滑。如今柏圖要返鄉下比賽，唔少人都笑佢高峰已過。但既能遠離煩囂，心靈得以重新洗滌，無論對比賽或人生都有新體會，技術層面亦可能得到提升。所謂多一分寧靜就多一分拚勁，我哋將見到一個耳目一新嘅柏圖，今場自由盃大戰會完全呈現出來。

所謂牡丹雖好都要有綠葉扶持，柏圖嘅隊友都相當猛料，包括前拜仁慕尼黑球員荷西古里路及備受歐洲大球會所注視嘅荷西保連奴，強大陣容令哥連泰斯成為自由盃其中一支奪標熱門球隊，今場作客唔可以輕視。講開自由盃奪標賠率，今屆小保加冷到20倍，實力去到邊球迷心裏有數。況且佢哋近期喺阿甲又冇場好睇，4月中對聖馬田聖祖安更以大比數慘敗。小保加已經冇晒惡氣，輝煌歷史對球隊嚟講已非支持理據，反成裹足不前嘅負累。