賓菲加福星高照博翻身

猪拉多纳

費倫巴治首回合放虎歸山

歐霸盃4強次回合，葡超勁旅賓菲加主場鬥土耳其球隊費倫巴治，賓菲加首回合多得門框三次擋出對手攻門，僅輸0比1，運氣相當不俗。今仗返回自己地頭形勢大為樂觀，因為賓菲加近19次主場出擊，取得17勝2和彪炳戰績，勝率近90%，球隊目標清晰，誓要淨贏兩球反勝晉級。費倫巴治射手韋保及防中美密特托普停賽，攻守能力皆受削，抵擋唔住主隊強襲，捧「讓球主勝」。

（有線62及202台周五凌晨3時05分直播）

好波不如好運，費倫巴治首回合三次中柱中楣，兼射失12碼，賓菲加運氣贏晒，即使最終輸一球亦未驚過。賓軍今季主場所向披靡，只係上年10月歐聯不敵巴塞隆拿，自此之後錄得17勝2和佳績，其中11次淨贏兩球或以上。翼鋒伊度亞度沙維奧更豪言必可殺入決賽，呢位22歲阿根廷國腳曾兩度協助馬體會奪得歐霸盃冠軍，堪稱「歐霸福星」，深信今仗屬於賓菲加表演時間。

除咗伊度亞度沙維奧之外，奧斯卡卡度素、洛迪高摩連奴、艾馬都係優質進攻好手，後備席上仲有巴西前鋒洛迪高利馬可以候命。教練佐治捷西斯手持大把好牌，隨時可以「撳掣」搶攻，要入兩球或以上，並唔困難。
費倫巴治兩主力停賽

費倫巴治首回合僅小勝放虎歸山，最大鑊係射手韋保及防中美密特托普累積夠黃牌，今場一齊坐波監，中場魯爾梅利斯亦有傷料缺陣。冇咗大隻佬韋保喺鋒線牽制，以及美密特托普中場掃蕩，更加難同賓菲加抗衡。而且土耳其球隊離開國土，往往冇料到，係時候行人止步。
晉級條件（費首回合勝1：0）

賓菲加晉級

‧淨勝2球或以上

‧勝1:0，需加時分勝負

費倫巴治晉級

‧勝或和

‧以1球差距落敗，但取得作客入球

‧負0:1，需加時分勝負