車仔撞散巴素利

猪拉多纳

賓帥臨走做好戲

英超要爭氣！今晚歐霸盃4強次回合有歐洲賽唯一剩低嘅英格蘭代表車路士，主場迎戰瑞士神奇球隊巴素利，近期喺史丹福橋球場表現Fit爆嘅車仔，絕對有力數多幾粒入決賽，一於撐2.07倍「讓主」。

（有線61、64、201及203、廣東體育周五凌晨3:05直播）

雖然話巴素利首次打入歐霸盃4強，鬥心唔會差，但車路士大軍對待呢項賽事同樣非常認真！佢哋以上屆歐聯冠軍身份降格踢歐霸，一開始雖然淪為笑柄，但球隊4強首回合作客2:1擊敗巴素利，家陣大有機會入決賽捧番隻盃，總算唔使「食白果」，眾將梗係搏命啦！借歐霸盃翻生嘅費蘭度托利斯今屆賽事入咗4粒，係家陣未被淘汰嘅隊伍中其中一位「士哥王」，加埋近期表現出色嘅域陀摩西斯，仲有攻勁過守嘅大衞雷斯幫手，憑佢哋近12場主場不敗戰績，要喺史丹福橋球場輕取巴素利入決賽，根本唔係難事。
主場醒近12仗不敗

「藍戰士」唔止球員有火，領隊都一樣想做番齣好戲！皇家馬德里响歐聯出局後，教頭莫連奴即刻話幾乎肯定走人返去佢受愛戴嘅地方，唔係講緊車路士又會係邊度先？照咁睇，賓尼迪斯走人之前，除咗想攞番隻盃塞住班反佢嘅車迷把口之外，相信佢場場都會落柯打要贏得精彩，無疑小妹對佢喺聯賽嘅功力有所保留，但出到歐聯戰場，由賓帥兩度帶利物浦入決賽嘅表現睇，絕對值得投信任一票。

仲有呀，巴素利今仗有表現出色嘅德高域停賽，佢哋可以喺8強兩回合頂住熱刺，呢位中堅功不可沒，今仗冇咗佢，面對志切奪冠嘅車路士，條後防線認真靠唔住，不過咁，以佢哋嘅級數，4強輸畀上屆歐聯冠軍出局，都算有交代o架啦！

首回合：車客勝2:1
車仔巴素利做「大」Show

車路士近8仗有7次開出入球大，巴素利則有6次。

車仔近8戰有7仗至少攻入2球。

巴素利近8場得1場冇失波。