慕遜主場恰慣史浩克

猪拉多纳

德甲獨腳戲慕遜加柏主場對史浩克04，史浩克上場大炒漢堡，荷蘭射手亨特拉爾復出即連中三元，目前正力爭下屆歐聯外圍賽參賽資格，不過佢哋作客一向曳，尤其面對慕遜加柏更長期被恰死，今場作客讓波風險高，寧捧1.85倍慕遜加柏「讓球主勝」。

（有線64及203台周六凌晨2時30分直播）

史浩克自從由暫掌帥印嘅贊斯基拿領軍後，整體演出同成績確有改善，目前排聯賽榜第四，領先法蘭克福同弗賴堡三同四分，好有機會攞到下屆歐聯外圍賽資格，不過作客唔掂始終係佢哋死穴，球隊近十一場德甲作客賽事只贏過兩場，上次作客面對陣容超殘陣嘅法蘭克福都要輸波，認真靠唔住，雖然亨特拉爾回勇，但另一進攻主力法芬仍然養傷，防線亦長期欠穩，戰鬥力唔算好勁。
近5次主場對賽全勝

慕遜加柏今季演出令人失望，但有一個特性係從未試過兩連敗，作客輸完返主場例踢爭氣波，近九場德甲嘅主場賽事取得六勝三和不敗佳績，球隊人腳配搭始終有質素，目前排第七仍有厚望爭奪下屆歐霸盃入場券，戰意唔差得過客軍。

教頭法夫爾近期起用穆拉柏取代令人失望嘅盧克迪莊掛帥，前線比以前有朝氣得多。慕遜加柏自09年起五次主場對史浩克取得全勝，今仗強陣出擊有信心搶分，主場受讓好着數。