拜仁二線兵惡過多蒙特

猪拉多纳

歐聯決賽預演 未必hea踢

今晚德甲多蒙特主場大戰拜仁慕尼黑，亦都係今屆歐聯決賽前哨戰。拜仁呢班「鬼見愁」提早贏咗今屆德甲冠軍，「蜜蜂仔」亦都肯定唔會跌出頭三名，下屆肯定直接入到歐聯分組賽。大家都唔使搏之下，預計呢場會收起大部分主力。比較兩隊嘅二線兵，拜仁仍然勝一籌，客勝買得過！

（有線61、64、201及203台周日凌晨零時30分直播）

今場波馬會冇開亞洲盤，隔籬埠開緊拜仁讓平半。寫緊呢篇稿時，外地莊家開出平均客勝係2.2倍左右，馬會今場壓低幅度大，客勝得1.9倍。雖然客勝熱過出面好多，但仍然捧得過。其實上周聯賽，兩隊為咗備戰周中歐聯都收起晒啲主力。拜仁派咗唔少副選上陣，仍然以一比○小勝弗賴堡，未坐穩正選嘅梳頓沙基利有得出場都好搏吓，最終都係憑佢一箭定江山！另外，有正選嘅比沙路雖然三十有四，但表現同班後生仔有得揮，淨係四月都已經有三個入球同三次助攻，就連只得十九歲嘅中場安利簡恩都唔失禮。

拜仁即使收起班主力，個陣都好見得人。由於咁，教練軒歷基斯今晚會唔會排個「hea」陣，仍然係個謎。德國《踢球者》網站預計陣容，拜仁又未必會收起晒主力，可能因為之前畀多蒙特威咗兩季，今晚會當報仇咁報，再加上拜仁本身作客成績十四勝一和不敗，勝算根本好高。
「蜜蜂仔」後備力量差得遠

多蒙特畢竟唔似得拜仁有咁強勁嘅後備力量，所以仍然唔能夠聯賽同歐聯都兼顧好，上星期聯賽同樣派副選，最終只係二比一贏「魚腩」杜塞爾多夫。我個人覺得「蜜蜂仔」啲小將，無論比頓確特、抑或賀夫曼仍然差啲火候。而且一旦收起羅拔利雲度夫斯基，箭頭只可以用番狀態極沉嘅舒希巴，周中馬里奧葛斯受傷，教練高普已經好頭痛，所以佢哋呢場根本冇本錢同拜仁鬥。由於之後仲有歐聯決賽，高普肯定錫住班球員，咁睇嚟想贏拜仁要等吓喇。
Wendy推介：

多蒙特 對 拜仁慕尼黑 客勝