賀芬咸自救誓破不來梅

猪拉多纳

德甲雙雄齊齊殺入歐聯決賽，多蒙特先後氣走上屆英超同西甲盟主，拜仁更先後以4:0同7:0嘅壓倒性比數擊潰意、西霸主祖雲達斯同巴塞隆拿。除比數外，最重要係姿態，祖記喺拜仁入決賽後，慨嘆抽籤失運，否則可以走得更遠；至於巴塞更加喺魯營徹底向拜仁投降放棄抵抗，象徵整個歐洲霸權正式轉移，Alwin根本睇唔到未來兩個球季，有任何球隊可以達到拜仁目前嘅高度，但就肯定拜仁下季將會更加強大，德甲盛世經已降臨，而且好有信心將會延續一段唔會短嘅日子！
換帥進步非勝不可

講完開心事，輪到講擔心嘢，講嘅係我居住城市嘅球會賀芬咸，球隊今季開得極曳，導致淪落尾二，但其實佢哋喺換帥後已經大有改善，新帥基斯度有貨交，球隊近七場聯賽三勝兩和兩負，不過目前形勢依然極兇險，皆因喺餘下三輪情況下，仍然落後奧格斯堡同杜塞爾多夫各三分，落後雲達不來梅五分，而且最後一輪要作客多蒙特，多蒙特球迷向來憎恨賀芬咸班主霍普，到時多蒙特唔會放鬆，所以賀芬咸嚟緊兩場波，包括今晚作客不來梅（周六晚9時30分開賽）同下輪主場對漢堡都係非勝不可。

不來梅目前狀態同士氣都比賀芬咸更差，已經運續十輪不勝，加埋只得四分，球員質庸又唔爭氣，近期兩名攻擊球員阿拿奧杜域同艾利亞更衰到因為紀律問題被內部停賽，令可用兵源更加買少見少，功勳教頭舒哈夫明顯未搵到止跌良方，面對勇往直前嘅賀芬咸輸埋都唔奇，推介賀芬咸「讓球客勝」。
Alwin 推介：

賀芬咸讓球勝 ★★★★

漢諾威勝 ★★★★

利華古遜勝 ★★★