多蒙特拜仁「大」鬥法

猪拉多纳

歐聯決賽預演

歐聯決賽今晚先嚟Rehearsal！多蒙特同拜仁慕尼黑周中順利殺入歐聯決賽，呢個亦係德國足球史上第一次咁威，絕對係幫德甲50周年贈興啦！咁啱今晚德甲又撞正多蒙特主場對拜仁喎，雖然勝負對兩隊聯賽排名已經零影響，但雙方點都係想喺歐聯決戰前先贏對方一振士氣啦！今場冇包袱相信會踢得更放，1.65倍入球大無走雞！（有線61、64、201及203、中央5台周日凌晨0:30直播）
拜仁近6戰5場入2球以上

拜仁近期表現勢如破竹，連巴塞都要連輸兩場大大劑啃咗7隻蛋！呢種咁強橫嘅戰鬥力可以用「恐怖」去形容，睇怕依家唔驚拜仁嘅球隊就只有多蒙特，皆因近3季「蜜蜂兵」8次交手贏咗5場，只輸過1場咁大把！何況今晚佢哋仲有主場之利，同拜仁直頭係半斤八両。

雖然勝負難料，但小弟肯定呢場會係場精彩嘅進攻對決。拜仁嘅超級火力大家都見識過，對上6場有5場射入3球或以上，莫講話洛賓、列貝利、湯馬士梅拿同文迪蘇傑呢條超級鋒線頻頻得手，就算後備兵馬里奧高美斯、比沙路同梳頓沙基利都有唔少斬獲，入球能力唔使懷疑。
蜜蜂兵鋒將照搏殺

多蒙特依家疊埋心水備戰歐聯，但波蘭射手羅拔利雲度夫斯基就要為爭聯賽神射手努力，佢只領先第2位利華古遜嘅傑斯寧一球，梗係入多幾粒穩陣啲啦！而下季會過檔拜仁嘅馬里奧葛斯有傷唔踢得，咁擔大旗嘅「新Keyman」馬高列奧斯就要趁機證明自己實力，呢場仲唔同拜仁駁火？
頂占筍盤：多蒙特（入球大）