車仔踩行油狂撼紅魔

猪拉多纳

殺入奧脫福搶歐聯入場券

英超今晚上演紅藍大戰，贏咗聯賽冠軍嘅曼聯喺奧脫福主場迎戰力爭歐聯席位嘅車路士，「紅魔鬼」主帥費格遜對車仔教頭賓尼迪斯恨之入骨，絕無放水之意，但佢哋實在太早喺聯賽甩開晒，依家連冠軍都袋埋，去到呢個階段冇晒目標，好難要班兵瞓身搏殺，讓波好惡搞！車仔經過連場大戰愈踢愈弗，今戰有坐和望贏之力，「讓球客勝」穩陣！

（有線200及300台周日晚11時直播）

曼聯前仗砌低阿士東維拉提前奪冠，主帥費格遜聲大大話餘下賽事唔會鬆懈，決心破埋車路士英超最高得分紀錄。講同做係兩回事，「紅魔鬼」上場鬥阿仙奴和緊一比一，尾段都冇乜意欲搶攻爭勝，梗係啦，冠軍都攞埋，仲有乜好爭吖，將士抱住呢種心態落場，搶截慢三拍，埋門hea踢，態度唔多積極。曼聯季尾領先優勢明顯，球員踢得懶懶閒，呢種情況屢見不鮮，喺今場大戰亦唔例外，始終要急嘅唔係佢哋，讓波咪搞。
地獄賽程愈踢愈精神

車路士嘅地獄賽程沒完沒了，上周中搞掂巴素利殺入歐霸盃決賽，馬上又要備戰今場大戰，嚟緊周中仲要硬撼爭奪歐聯席位大敵熱刺，硬仗一場接一場。不過，車仔喺艱難賽程下愈踢愈有信心，近期改踢防中嘅大衞雷斯上晒身頻入靚波，前線費蘭度托利斯亦已回勇，加上冇份打歐霸盃抖夠嘅射手丹巴巴亞，人手調配唔成問題。車路士同阿仙奴及熱刺鬥得難分難解，再冇失分空間，今場點都會搏命搶分，決心更勝對手。
曼聯心態放鬆讓唔起

「紅魔鬼」快翼艾舒利楊格因傷收咧，箭頭韋碧克受傷休戰，其餘主力基本上都踢得，論體力一定好過對手，不過個人認為球員心態先係今場勝負關鍵，大家睇到港甲日之泉JC晨曦點樣喺絕境砌低勁旅南華護級成功，車仔情況冇咁危急，但相信佢哋比曼聯更上心更肉緊。兩隊今季先後四次碰頭，錄得一勝兩和一負，車仔不落下風，今場可捧「讓球客勝」，進取可博埋客勝！