紅軍冇哨牙蘇更加放

猪拉多纳

蘇亞雷斯口痕一咬，除咗令到佢冇咗個神射手獎外，仲有喺由400幾個記者投票嘅足球先生，佢居然只得一票，對佢自己嚟講都真係冇癮。當以為利記冇咗哨牙蘇會唔掂檔，點知佢哋上周作客紐卡素踢得更加整體，清風送爽大勝六球，真係呃盡各位。今晚主場出擊，睇好佢哋生活好喺打吡戰再勝一仗。
愛華頓喺晏菲路唔識踢

雖然雙方分數上都好難爭踢歐洲賽，但話明係打吡戰，大家都要鬥分數排名，為啖氣今晚雙方一定踢到飛沙劈石！今晚蘇亞雷斯繼續停賽，但原來今季紅軍聯賽哨牙蘇冇上陣兩次，居然射入9球。大家睇數字都好難理解，但睇番上仗紅軍用史杜列治攻堅，同班中場反而更加合拍，尤其是「百鬧成材」嘅佐敦軒達臣踢出信心，仲有菲臘比古天奴狂放致命直線，紅軍反而踢出進攻新風格，原來冇咗哨牙蘇並非末日。

至於愛華頓近期作客表現都冇季中咁勁，主因係兩位進攻主力費蘭尼同謝拉域狀態唔多好，近6場作客不勝之餘，更有3場入唔到波。往績上愛華頓由14年前作客晏菲路已經未贏過波，最近12次聯賽對賽更只曾勝出1場，真係未踢都輸晒心理同士氣！
Kit推介：利物浦 主勝