紅軍打吡戰火氣大

猪拉多纳

謝拉特發功 寸爆愛華頓

謝拉特發功寸爆愛華頓，今場默西賽德郡打吡戰肯定激上加激，入波唔會少！英超早場利物浦主場惡戰愛華頓，紅軍雖有蘇亞雷斯停賽，但剛照炒紐卡素六粒，難怪「謝老四」賽前勁囂挑釁死敵。喺聯賽榜力壓紅軍，係愛華頓最佳報復辦法，拿仁認為呢場唔好諗邊隊贏喇，捧大啦！

（有線300及200台周日晚8時30分直播）

默西賽德郡打吡係英格蘭球壇其中一場最激打吡戰，激烈程度不下於曼市打吡同北倫敦打吡，無論雙方當季幾霉幾曳，但一見同市仇人就即時醒神，落到場飛沙劈石，充滿球味。今季利物浦成績麻麻，已九成九絕緣下屆歐戰，依家唯一目標，就係希望於聯賽榜壓過死敵愛華頓。依家紅軍落後排第六嘅「拖肥糖」五分，隊長謝拉特賽前罕有地大出口術，話就算死敵本季最後排名高過紅軍，都唔算係乜嘢成就，因為「拖肥糖」近年根本乜盃都未攞過，如果愛華頓球迷咁就高興，就由得佢哋開心囉！

謝拉特好少咁多口，佢咁講正正反映紅軍其實好介意排名，所以喺今場第100次紅軍主場默西賽德郡打吡，希望大勝省招牌。唔好以為「哨牙蘇」缺陣紅軍就冇料到，上仗炒紐卡素一役，史杜列治弗爆梅開二度，佐敦軒達臣都入兩粒，連「玻璃腳」波連尼都有士哥，加埋菲臘比古天奴狀態勇極，以及上季主場鬥愛華頓「戴帽」嘅謝拉特，主場出擊唔慌冇波入。
愛華頓中場有效率

愛華頓近期作客戰績較曳，不過一鬥利物浦就肯定上身，要打番早前作客賽和熱刺二比二嘅水準唔難，加上愛華頓一贏，就肯定喺聯賽榜壓倒紅軍，戰意一定高昂。雖然箭頭謝拉域同安尼捷比都信唔過，但中場個個入得，費蘭尼弗番，加埋入波好有效率嘅米拿拉斯，呢次打吡戰有望延續近五次對賽四次開大強勢，捧大盤！