皇馬馬拉加玩鋪大

猪拉多纳

兩軍教頭唔衰得實喪攻

周中西甲重頭戲，皇家馬德里主場迎戰馬拉加。若皇馬今仗失分便讓宿敵巴塞提早封王，以「寸王」莫連奴同C朗咁要面嘅個性，斷唔會以咁嘅方式投降，不過馬拉加對爭逐來屆歐聯入場券未死心，況且教練比歷連尼對舊東家恨之入骨，每次碰頭都搏甩髀，火力全開一定精彩，大細中位數調至3.5球照捧大盤。

（now 632周四凌晨3時30分直播）

自歐聯出局後，「銀河艦隊」皇馬面臨解體，不過從上仗主場反勝華拉度列4比3一役，亦得出一個結論，皇馬喺巴拿貝球場出賽面子攸關，喺「皇粉」面前點都要搏到盡。況且今仗若只取得一分，皇馬喺剩番三輪情況下落後巴塞十分，變相為後者登上聯賽王者寶座加冕，對於皇馬而言係極大侮辱，因此戰意必堅。
C朗衝「艦隊200」里程

據《馬卡報》披露，雖然主帥莫連奴已眾叛親離，但全隊暫時簽署「12日停戰協議」，眾將唔會喺內部搞事，喺西盃決賽對馬體會之前全心全意比賽，王牌射手C朗只差一粒便喺「銀河艦隊」入波達到二百大關，佢必定施展渾身解數爭取士哥，實現個人里程碑。

對手馬拉加被歐洲足協禁止參加下屆歐洲賽，理應搏都無謂，不過該隊正為此上訴，喺未知結果下，必定先做好本分盡力搶分，現時馬軍只落後「四哥」皇家蘇斯達五分，仍有力爭歐聯外圍賽資格，加上主帥比歷連尼仍為2010年被皇馬炒魷而耿耿於懷，每次帶隊倒戈都當決賽咁踢，加上皇馬中堅沙治奧拉莫斯及華拉尼因傷上陣成疑，後防隱患重重，益晒馬拉加中場核心艾斯高同巴迪斯達打反擊，呢場癲鳳鬥狂龍格局，總入球要過四粒可謂應該冇問題，大盤有1.8倍咪嫌少。

猪拉多纳