李斯特城誓破殘兵屈福特

猪拉多纳

爭升班狐狸捉黃蜂

寧捧當頭起，「狐狸」勢勁可玩死「黃蜂」！李斯特城英冠升班附加賽首回合主場硬撼屈福特，李軍上賽戲劇性贏波殺入前六，屈軍就輸波未能直接升班，講士氣「狐狸」贏晒；屈軍仲要前、後線都唔齊腳，受讓平半都咪掂！

（周五凌晨2時45分開賽）

英冠去到最後戲肉，卡迪夫城、侯城分列冠、亞軍直接升班，三至六名屈福特、白禮頓、水晶宮同李斯特城，就打附加賽爭奪最後一個升班席位。講人腳同穩定性，屈福特本季的確較李軍為佳；但球隊到季尾明顯跌Watt，最後十輪贏得三場，英冠最佳球員馬迪維達近十二仗冇波入，近三戰入三球嘅靈魂前鋒迪尼今場又停賽，鋒力肯定削弱。前阿仙奴門將艾蒙尼亞有傷在身，就算能披甲必影響表現，屈福特前後兩線均有隱憂。
蘇拿抱怨未能直升英超

聯賽最後一戰主場對列斯聯，屈軍於最後時刻輸波，未能攞三分進佔第二攞直接升班資格，領隊蘇拿表明職球員都好失望，士氣唔慌好。相反李斯特城就死過翻生，作客勁敵諾定咸森林，於補時階段奠勝僅僅殺入前六，目前士氣贏對手成條街。

李斯特城季尾豁出去喪攻，於傷兵潮過後明顯有較佳演出，近五仗轟入十一球。球隊主場入球數字係英冠第二高，而勝率亦列聯賽第三，威力唔講得笑。攻擊手安迪京治同基斯活特都弗，神射手紐根特亦可披甲，氣勢如虹下讓得起平半！