捧燕豪芬客勝ＡＺ

猪拉多纳

荷蘭盃周五凌晨上演終極決賽，阿爾克馬爾於中立場鹿特丹飛燕諾球場鬥燕豪芬。阿爾克馬爾今季聯賽兩循環碰頭均告落敗，就算季尾狀態有回勇迹象，亦難阻擋燕豪芬強勢衞冕，波童簡單捧客W。

（周五凌晨零時開賽）

阿爾克馬爾（AZ）季初出閘脫腳，現今於聯賽榜僅排第十，不過由於燕豪芬幾已穩奪歐聯外圍賽入場券，AZ無論贏輸都可取得來屆歐霸盃參賽資格。AZ季尾踢番應有水準，對上四場聯賽贏三場，不過唯一輸波對手正正就係燕豪芬，連埋首循環作客大敗一比五，AZ近六次對賽輸咗五次，其中有四次以兩球或以上差距落敗，所以就算佢哋近期頻頻報捷，估計亦只可將戰情拉緊，想爆冷捧盃唔容易。
燕豪芬猛火兼顧大盤

燕豪芬今季失落聯賽錦標，同佢哋二、三月多場作客比賽失準有關，不過來到最後直路，由於要爭奪來季歐聯入場券，燕豪芬愈戰愈勇，近五場聯賽贏四場兼攻入十七球，令全季聯賽總入球數字達一百零二球。陣中四大射手梅頓斯、謝明蘭斯、馬達夫斯及韋拿杜姆今季聯賽都有雙位入球數，攻力十足，既然有往績支持，有力於法定時間內殺敗對手成功衞冕。由於燕豪芬攻力強橫，佢哋最近五次大細中位數調至3.5球嘅比賽都能順利開大，今場中位數不變維持2.5球，雖然大盤賠率只有1.43倍，但仍值得兼投。