荷盃決賽秤先燕豪芬

猪拉多纳

喺荷甲屈居亞軍嘅燕豪芬（PSV），唔想今季四大皆空，今晚荷蘭盃決賽喺中立場對住實力差一截嘅阿爾克馬爾（AZ），肯定有殺冇賠。最緊要係PSV主帥艾禾卡特與隊長雲邦美都有可能喺季尾走人，相信一班隊友都會搏老命送別呢兩位功勳將帥，今場PSV讓波，照捧2.25倍「讓球客勝」。

（開賽時間：周五凌晨0:00）

雖然聯賽仲有一輪，不過以4分落後「一哥」阿積士嘅燕豪芬已提早宣布爭標無望，唯一慶幸係佢哋亦以3分兼龐大得失球優勢壓住第3位嘅飛燕諾，基本已穩奪亞軍。當然，一個亞軍又點夠佢哋同球迷交差，今晚嘅荷蘭盃根本係不容有失。

再者，近排有消息指出，PSV主帥艾禾卡特計劃下季去俄超教波尋求新挑戰，而雲邦美則話睇吓季尾感覺先決定係咪留隊，換句話講隨時會掛靴都唔出奇。
阿爾克馬爾對賽輸條街

仲有一點，查實燕豪芬所在嘅艾恩德霍芬市已經安排好今晚決賽賽後，會喺市內大會堂舉行祝捷派對，搞到咁高調，擺明係對捧盃信心十足，試問仲有邊個球員敢唔落力掃大家興？

AZ呢邊，老牌勁旅今季表現大走樣，直到兩周前先徹底擺脫解班漩渦。佢哋今鋪話就話搏命，近態又好似唔差，但其實近仗佢哋所砌低對手嘅實力根本唔算突出，以佢哋近6次同燕豪芬交手，竟然輸咗5場，今仗應該凶多吉少。
荷盃賽制

今輪為決賽，如法定時間內打和將加時30分鐘，未分勝負則以互射12碼決勝。