莫迪求開齋好「大」喜攻

猪拉多纳

衞冕挪超冠軍莫迪今季出閘脫腳，仲成為聯賽唯一一支未開齋嘅球隊，認真肉酸！今仗返回主場對阿里辛特，肯定喪攻對手以求打開勝利之門，不過佢哋防線甩漏甚多，撞啱對手阿里辛特火力都唔弱，咁睇法1.65倍入球大就最抵玩。

（開賽時間︰周五凌晨0:00）
主場4鬥阿里辛特多波入

莫迪由曼聯名將蘇斯克查執掌後，唔單止攞到球會史上首個頂級聯賽錦標，上季仲成功「冧莊」。正當大家諗住佢哋力爭3連霸嗰陣，球隊突然大跌Watt，聯賽7場未贏過。防線不穩係球隊致命傷，就算試過多種後防配搭，但依然未能取得成果。好彩佢哋攻力有助改善，計埋盃賽連續6場有波入，難怪蘇斯克查賽前夠膽喺當地電視台《TV2》下達「必殺令」。相信今場佢哋會以攻代守，入球睇怕唔會少。

對手阿里辛特今季火力強勁，射手歷基占士射術出色，配上中場巴蘭迪斯、史超活後上攻門，難怪佢哋7場聯賽轟入13球，平均每場接近入2球。翻查紀錄，莫迪連續4次喺主場鬥阿里辛特全部開大，相信今晚都係一副「駁火格」。