列高巴復出捧國民隊「讓主」

猪拉多纳

南美自由盃16強次回合聽朝又有好戲上演，嚟自烏拉圭嘅蒙特維多國民隊返主場，對住秘魯「阿二」皇家加斯拿素，1.82倍「讓主」值得熱捧。首回合國民隊有隊長列高巴因傷缺陣，好在佢已經好番，能夠喺今場大戰領軍，有條件收復首回合落後0:1失地反勝晉級！

（廣東體育周五早上8:15直播）
皇家加斯拿素隊長走人

首先，大家咪畀國民隊日前以0:3慘負彭拿路嘅聯賽嚇親，查實佢哋冇厘頭有3個球員被逐，至會搞到咁嘅田地。再講，首回合因傷避戰嘅隊長列高巴同射手艾比奧，最近已經分別傷愈，而且有份喺上場聯賽後備落場，話晒36歲嘅列高巴都係隊中精神領袖，有佢睇住呢隊烏拉圭班霸定好多。

另一方面，秘魯嘅皇家加斯拿素首回合主要恃住喺高原主場出戰，先至能夠贏波，不過佢哋贏得1粒，擺明質素有限。事實上，加斯拿素嘅首席射手安迪賓度，分組賽前已經跳槽到拉斯彭馬斯，到咗首場分組賽後，更加連隊長雷蒙洛迪古斯都走人，咁嘅身世入到16強已經係超額完成，作客要唔過。

首回合：蒙客負0:1
自由盃賽制

採主客兩回合制，今輪為16強次回合。如法定時間內打和將計作客入球優惠，未分勝負則於次回合法定時間後以互射12碼決勝。