會長督操波圖鬥志可「加」

猪拉多纳

葡超今晚上演全季最關鍵一仗，由聯賽「老二」波圖主場火併「一哥」賓菲加，目前波圖喺積分榜落後2分，聯賽剩番兩輪，想奪標今仗自然係非勝不可。佢哋個會長賓圖達哥斯達星期三親臨訓練場督操，隊波嘅士氣同鬥心爆棚，撞正客隊分心歐霸爭冠軍，頻密戰線身心俱疲，波圖應該有機可乘，主隊讓平半，力奇捧1.77倍上盤。

（開賽時間：周日凌晨3:30）

賓菲加爭標形勢本來大好，可惜係佢哋近三個禮拜幾乎都係一周雙賽，上周中喺歐霸盃擊敗費倫巴治入決賽後，結果到周一聯賽就表現跌Watt，和咗艾斯杜尼0:0，聯賽榜領先優勢由4分變2分，令波圖爭標重現生機。
賓菲加分心歐霸攰到爆

最慘係嚟到呢個生死關頭，賓菲加卻仲要為下周四凌晨嘅歐霸盃決賽分神，就算佢哋話唔會留力，但有所顧忌似乎係難以避免。更加大鑊係，賓菲加今仗仲有中場重心安素佩雷斯腳傷上陣成疑，以及卡路士馬田斯停賽，佢哋今仗作客火龍球場，全場接近52,000張飛，就只獲分配2,500張飛，聲勢都肯定輸埋，想話保住不敗真係唔易。

波圖呢邊，會長賓圖達哥斯達周三帶埋幾位球會高層一齊督操打氣，軍心肯定大振。賽前佢哋仲收到好消息，包括守將希達基奴文斯、馬爾干彭利拿同阿歷辛度3個傷兵都已經齊齊復操，有望強陣出擊，以佢哋聯賽5連勝走勢，喺主場有望贏波扭轉形勢。